يوليو

مش عارف ايه اللي جرالي

بغلط غلطات غبيه وملهاش اي لازمه

مش مركز

لأ هي الحقيقه اني دايما بتحجج بقلة التركيز لما أغلط كتير

مش عارف بجد مالي

بفتقد الرضا يمكن

الحمد لله على كل حال

خلاص ده شهر جديد وزي ما بدأت الشهر اللي فات وكلي تصميم على انه يكون شهر سعيد هيكون هدفي الشهر ده هو التركيز

عايز اركز في كلامي

واركز في تصرفاتي

واركز في كلام اللي حواليا

واركز في تصرفاتهم

عايز اركز على مشاعري

عايز اركزعلى مشاعر اللي حواليا

بجد عايز اركز

لغز

هل في حد بيعرفنا بشكل كامل؟
هل في حد بنكون معاه كتاب مفتوح بزاويه ميه وتمانين؟


ساعات بسأل نفسي هو في حد يعرفنا بجد
ساعات بقول مش معقوله كل اللي حواليا ميعرفونيش ومش معقوله برضه يعرفوني

يعني مقدرش اقول على زمايل الشغل انهم يعرفوني لانهم بيشوفوا جزء واحد مني بس

ومقدرش اقول على كل اصحابي بيعرفوني لأن دايما بيكون في شيء مش كامل
شيء مش معروف
يمكن ميغيرش كتير في نظرتهم ليا او طريقه تعاملهم معايا بس بيفضل جزء مني مختفي عنهم
وبالتالي هما كمان ميعرفونيش

ومقدرش اقول على معارفي انهم يعرفوني لأنهم في الاول والآخر معارف بيشوفوا فيا زاويه واحده

ومقدرش طبعا اقول على حد بعرفه بصوره عابره واللي ساعات بحتاج اكتب كومنت عنه في تليفوني انه معرفه طياري انه حد يعرفني لأني اصلا مبكونش اعرفه ولا بديله الفرصه انه يعرفني

مش عارف ايه اللي بيخليني افكر في ده دلوقت

يمكن كلام قريته

يمكن احساس حسيته

يمكن موقف مريت بيه

مش عارف

بس اللي عايز اعرفه

هو في حد بيعرفنا بجد

مفيش حاجه

مفيش حاجة ولو كان حتى فى حاجة انا هفضل اقول برضو مفيش حاجة
عشان اخلص عشان مفضلش اتكلم ولا يرسى كلامى برضو على حاجة
بتسأل ايه مغيرنى لو انت مكانى تعذرنى بجرحى ليه تفكرنى
ياريت لو موتت قدامك متسألنيش على حاجة
حبيبى ارتاح وريحنى سؤالك عنى جرحنى ماتفخهم ليه بتدبحنى سنين جنبك بتألم ولا فارقة معاك حاجة

محمد محي

لو كنت فقط أتلاشى

من فتره ابتديت أتابع مسلسل أسمه
Doll House
المسلسل كان بتنزل حلقاته على النت تقريبا حلقتين في الاسبوع لغايه ما نزل منه اتناشر حلقه وده كان الموسم الأول على اساس ان الموسم التاني ينزل في بدايه الخريف تقريبا
أول حلقه في المسلس لغايه ما قربت تخلص مكنتش فاهم اي حاجه وبعدين بدأت الخيوط كلها تظهر وكل حلقه يظهر شيء جديد أكتر لغايه ما في نهايه الموسم كانت الصوره واضحه
بيتهيألي الفكره نفسها مش جديده بس عجيتني جدا ودخلت دماغي
القصه بتدور حوالين بيت بيتم فيه برمجه البشر
بتعمل تعاقد لمده خمس سنين أول ما بتدخل بيتعملك عمليه مسح وفيه بتتمسح شخصيتك تمام وتتسجل على الكومبيوتر في نسختين واحده اصليه وواحده احتياطي عشان بعد الخمس سنين ترجع لشخصيتك تاني وبعد المسح بتكون زي الطفل بس بترعف مبادىء الاشياء
طريقه المشي والكلام والشرب
بس بتكون من جوه املس
بدون ذكريات
بدون مشاعر حب أو كره
بدون أي أحلام أو أمال
بيتهيألي يمكن ده بيكون نفس موقف الفاقدين للذاكره
وبعد كده بتعيش في البيت اللي بتكون الخدمه فيه خمس نجوم
طبعا الدنيا مش وردي على طول
هنا تيجي مرحله الطباعه
في المرحله دي بيطبعوا على شخصيه الانسان او الدميه زي ما هو في المسلسل شخصيه جديده ممكن تكون مش شخصيه واحده ممكن تكون مزيج من أكتر من شخصيه ومش بس كده ممكن يضاف عليها مهارات فرديه يعني مثلا ممكن تعمل شخصيه تكون مزيج من شخصيه كاتب أو مفكر وتديله مهارات القتال حاجه كده زي محمود سامي البارودي في زمانه يعني
والطباعه بتكون لمهمه محدده
يعني مثلا بطله المسلسل مفروض انها كانت كارولين واللي اختارت انها تكون من اعضاء المنظمه وتم مسح شخصيتها واصبحت بكده شخصيه جديده او طفله كبيره بالمعنى الحرفي للكلمه واسمها أيكو وفي كل يوم بتطلب في مهمه معينه ويتم الطباعه عليها بالشخصيه الجديده ولما ترجع من المهمه تتمسح الشخصيه وترجع ايكو تاني وهكذا يعني في يوم هتكون الحبيبه اللي في الحقيقه ماتت بس الحبيب مش قادر ينسى اليوم اللي ماتت فيه من غير ما تشوف هديته ليها وعايز دميه تعيش نفس شخصيه الحبيبه الميته ويعيش معاها اللحظه
وفي يوم تكون الفتاه اللي عاشت طفوله تعيسه وهي الوحيده اللي تقدر تساعد الطفله التعيسه الموجوده في ملجأ محدش قادر يفهمها فيه
وبرضه الدنيا مش ورد كده على طول احيانا بيكون الموضوع فيه مخاطره

بس الفكره
انك مش بس تعيش حياه تانيه
لأ انت هتعيش مئات منها

ساعتها فضلت أتفرج على المسلسل وانا بفكر اد ايه الفكره ممكن تكون ساذجه وقديمه
بس بالنسبه لي لسه عبقريه

لغايه ما في يوم اندمجت في قرايه القصه الجديده ولما خلصت كتشفت أن مع الكتاب بعيش فعلا حياه تانيه
مبكونش أنا مقيد
بكون أنا البطل والبطله
انا الأحداث نفسها
بيوجعني القلم المطبوع على خدود البطله كأنه على خدي أنا
بيعذبني حيره البطل وارقه وكأني أنا اللي سهران طول الليل مش هو

ساعتها لاقيت انه من غير تكنولوجيا حديثه ولا اجهزه معقده
الدنيا ابسط من كده

على الهامش

العنوان كان جمله على لسان البطل في روايه بهاء طاهر الحب في المنفى بس حسيته انه أنا مش جمله في كتابي ولا حتى عنوان لبوست

الزعل

لو واحد زعل من حد مفروض يفكر

في نفسه انه زعلان ومش عايز أي حاجه غير شويه وقت يقألم نفسه

ولا

في نفسه برضه انه زعلان ولازم ينفجر في الآخر ويقول انه زعلان من كذا وكذا وكذا

ولا

في نفسه برضه انه زعلان ومش هيعمب اي حاجه قبل ما الطرف التاني يحس بغلطته

ولا

في الآخر اللي أكيد متضايق من شيء ما انت عملته أو قلته أو مقلتوش أو معملتوش

ولا

في الآخر برضه اللي اكيد ليه حق عليك بشكل أو بآخر أنك تكون جنبه في كل وقت سواء كان محتاجك أو لأ

ولا

في الآخر برضه لأن خيركم من يبدأ بالسلام

للأسف أنا مش عارف